日本櫻花季即將開始！如果問香港人呢幾年最掛住日本嘅乜嘢，相信櫻花係好多人第一時間諗起嘅答案之一。過去三年無得去日本，今年終於可以再去賞櫻啦！日本氣象株式會社最近公布咗2023年日本各地嘅櫻花開花日預測圖，最快3月22日東京就會開花啦！小編為大家整理日本各地適合賞櫻花嘅地點，快啲買定機票啦！
根據日本氣象株式會社公布嘅第一回開花日預測圖，各地開花時間如下：
- 東京：3月22日
- 福岡：3月23日
- 名古屋：3月25日
- 大阪：3月28日
- 仙台：4月8日
- 札幌：4月30日
提提大家，以上只係預測開花嘅日期，通常被認為最靚嘅「滿開日」係距離開花日大概一個星期後。而滿開日後過幾日就會迎來櫻花落下嘅「吹雪期」，亦都係另一種美景！
▼預計各地「滿開日」日期
小編亦整理咗一啲熱門嘅賞櫻地點，大家可以睇下邊啲地方就腳，去旅行嘅時候順便賞櫻。
【14個賞櫻地點推介】
【關東地區】
東京——新宿御苑
位於東京市區嘅新宿御苑交通非常方便，因此係唔少當地人以及遊客嘅首選，無論賞櫻定係賞楓葉都係一個好地方。而且因為新宿御苑嘅櫻花樹品種比較多，所以賞花期一般較其他地方長。
▼新宿御苑
新宿御苑
- 地址： 東京都新宿区内藤町11 (地圖)
- 開放時間：9am – 4pm；逢星期一休息
- 電話：+81 333500151
- 新宿御苑官方網站
東京——上野恩賜公園
上野恩賜公園亦係一個東京市區賞櫻嘅好選擇，同樣深受日本人喜愛。每年櫻花季都會有大約800棵櫻花樹綻放，非常壯觀，唔少民眾會一邊野餐一邊賞櫻。
▼上野恩賜公園
上野恩賜公園
- 地址： 東京都台東区上野公園 (地圖)
- 開放時間：5am – 11pm
- 電話：+81 338285644
- 上野恩賜公園官方網站
東京——隅田公園
隅田公園位於淺草站附近，喺「吾妻橋」與「櫻橋」之間。沿隅田川步行至隅田公園期間，可以欣賞隅田川兩岸約450棵櫻花樹。到達隅田公園後，雖然櫻花樹數量唔算密集，不過勝在可以欣賞埋晴空塔嘅景色。
▼隅田公園
隅田公園
- 地址： 東京都台東区花川戸1丁目 (地圖)
- 開放時間：24小時
- 電話：+81 352461321
- 隅田公園官方網站
【關西地區】
大阪——大阪城公園
大阪城公園位於大阪府中央，唔止交通方便，規模仲非常大。園內嘅西之丸庭園種植咗約300棵櫻花樹。除咗可以賞櫻之外，仲可以順便參觀大阪城天守閣等歷史性建築。
▼大阪城公園
大阪城公園
- 地址： 大阪府大阪市中央区大阪城1-1 (地圖)
- 開放時間：24小時
- 電話：+81 667554146
- 大阪城公園官方網站
大阪——大阪造幣局
大阪造幣局以「櫻花大道」聞名，種植嘅櫻花樹多達125種，每年四月中旬都會有約一星期時間對外開放，等民眾可以入內賞櫻。不過今年嘅確實開放日期仲未公布，想去賞櫻就要密切留意住啦！
▼大阪造幣局
大阪造幣局
- 地址： 大阪府大阪市北区天満1丁目1-79 (地圖)
- 開放時間：未公布
- 電話：+81 663515361
- 大阪造幣局官方網站
大阪——萬博紀念公園
萬博紀念公園除咗以由藝術家岡本太郎擔任製作嘅「太陽之塔」聞名之外，仲係一個熱門嘅賞櫻勝地。萬博紀念公園種植超過5000棵櫻花樹，佈滿成條道路，非常壯觀。園內仲設有博物館、餐廳、日式庭園等設施，賞完櫻都唔怕無嘢做。
▼萬博紀念公園
萬博紀念公園
- 地址：大阪府吹田市千里万博公園 (地圖)
- 開放時間：9:30am – 5pm；逢星期三休息
- 電話：+81 668777387
- 萬博紀念公園官方網站
京都——哲學之道
哲學之道係一條步行道，位於京都市左京區，鄰近知名嘅銀閣寺、南禪寺。春天有盛開嘅櫻花、秋天有紅葉，因此被選為日本百大街道之一。而且因為係一條街道，所以不設開放時間，隨時想去都得。當櫻吹雪嘅時候，花瓣散落喺河面上，喺呢度散步心情都好啲。另外，呢度有唔少貓咪出沒，愛貓之人行行下隨時有驚喜！
▼哲學之道
哲學之道
- 地址：京都府京都市左京區 (地圖)
京都——二條城
位於京都嘅二條城係世界文化遺產，以華麗嘅宮廷建築、庭園風景聞名，係唔少遊客到訪京都嘅必去景點，每逢櫻花季人潮就更誇張。城內超過400棵櫻花盛開，配合二條城建築物嘅風景，非常古色古香。
▼二條城
二條城
- 地址：京都府京都市中京区二条城町541 (地圖)
- 開放時間：8:45am – 4pm
- 電話：+81 758410096
- 二條城官方網站
【九州地區】
福岡——舞鶴公園
舞鶴公園鄰近福岡市區，係福岡市內賞櫻最著名嘅地方之一。除咗有過千棵櫻花樹之外，每逢櫻花季呢度仲會有「福岡城櫻花祭」，有唔少特色攤檔，非常熱鬧。
▼舞鶴公園
舞鶴公園
- 地址：京都府舞鶴市南田辺 (地圖)
- 開放時間：24小時
- 舞鶴公園官方網站
福岡——淺井一本櫻
一般常見嘅賞櫻勝地都係以櫻花樹數量眾多而聞名，但係淺井一本櫻就恰恰相反。呢度只有一棵樹齡超過100年嘅櫻花樹，喺1986年被指定為市內嘅保持樹木，受到當地人悉心保護，可以話係寶貴嘅綠化財產。除咗欣賞櫻花樹本體之外，仲可以打卡映照喺池面上嘅「倒立櫻花」，好似天空之鏡咁，非常特別。
▼淺井一本櫻
淺井一本櫻
- 地址：久留米市山本町耳納1511-1 (地圖)
- 開放時間：24小時
【北海道地區】
北海道——圓山公園
圓山公園位於札幌市區，係北海道嘅賞櫻勝地。去圓山公園嘅話一定要去公園入面嘅北海道神宮，因為氣候緣故，呢度係全日本少數有機會睇到櫻花、梅花同時盛開嘅地方。
▼圓山公園
圓山公園
- 地址：北海道札幌市中央区宮ケ丘3 (地圖)
- 開放時間：24小時
- 電話：+81 116210453
- 圓山公園官方網站
北海道——松前公園
松前公園因為位於北海道嘅最南端，所以係北海道內櫻花相對比較早盛開嘅地方。園內種植過萬棵櫻花樹，仲有各種各樣嘅歷史遺跡，櫻花季嘅時候仲會舉辦櫻花祭典！
▼松前公園
松前公園
- 地址：北海道松前郡松前町松城 (地圖)
- 開放時間：24小時
- 電話：+81 0112314111
- 松前公園官方網站
【中部地區】
名古屋——名古屋城
名古屋城除咗係一個著名嘅歷史古蹟之外，同時亦係一個賞櫻嘅好地方。喺櫻花季嘅時候，呢度有過千棵櫻花樹綻放，以名古屋城作為背景，配上象徵日本嘅櫻花，非常有日本風情。
▼名古屋城
名古屋城
- 地址：愛知県名古屋市中区本丸１−1 (地圖)
- 開放時間：9am – 4:30pm
- 電話：+81 522311700
- 名古屋城官方網站
名古屋——東山動植物園
東山動植物園唔止係日本第三大動物園，仲係唔少人選擇賞櫻各地方。植物園嘅「櫻花迴廊」入面有超過100棵櫻花樹。賞完櫻仲可以順便去埋動物園，適合一家大細去玩！
▼東山動植物園
東山動植物園
- 地址：愛知県名古屋市千種区東山元町3丁目70 (地圖)
- 開放時間：9am – 4:30pm；逢星期一休息
- 電話：+81 527822111
- 東山動植物園官方網站
The post 【日本櫻花情報2023】最新日本各地開花日預測時間表！東京3月22日、大阪3月28日！全日本14個賞櫻地點推介！ appeared first on Flyday.hk.
香港旅遊優惠情報TG Group
[香港結伴同遊交友] -分享旅遊著數優惠及遊記攻略,一起去旅遊吧!! IOS下載 Android下載
[香港房屋分租共享App] - 室友合租,出租買賣,夾租短租,車位買賣,二手傢俬電器! IOS下載 Android下載
HKchat [香港匿名朋友圈] -- 一齊講秘密! 交友約會! 完全匿名!完全免費! 想講咩就講咩!! IOS下載 Andorid 下載
