幾年無得去旅行，大家一定好掛住日本。日本開關後，相信好多人已經迫不及待買咗機票返鄉下。但係咁耐無去過，大家可能未必清楚東京有啲咩新景點，或者有咩地方已經結業。唔使擔心，小編為大家持續更新東京最新旅遊資訊，以及搜羅各個最新景點。如果唔記得咗由機場出發到市區嘅交通方法嘅話，可以參考成田機場交通攻略、羽田機場交通攻略，如果對迪士尼有興趣嘅話，亦可以睇下東京迪士尼2023活動整合。
相關優惠：【日本櫻花情報2023】最新日本各地開花日預測時間表！東京3月22日、大阪3月28日！全日本14個賞櫻地點推介！
景點資訊
【六本木虎之門・麻布台——teamLab即將進駐】
東京好快會有新地標！仲會有大家最愛嘅teamLab進駐添！全新地標「虎之門・麻布台」位於六本木、虎之門中間，係一個結合住宅以及商業中心嗰社區，預計喺3月完工。項目包括一棟330米高嗰摩天大樓，高到可以同東京鐵塔相望。裏面有超過150間店鋪，包含美食、購物、娛樂等設施，當中最令人期待嗰就係teamLab Borderless亦會進駐，可能係最近東京市區嘅teamLab添！相信又會引起一陣打卡熱潮。
因為開發商好重視商業發展同埋綠化嘅平衡，所以「虎之門‧麻布台」入面都充滿住綠色元素，最大賣點就係佢嘅中央花園廣場，望落就好似城市中嘅綠洲咁。落成後得閒無嘢做去行下，應該都幾chill！
虎之門‧麻布台
- 虎之門‧麻布台官方網站
【新宿東急歌舞伎町】
東京新宿4月會有新嘅地標開幕！ 入面將會包含各種娛樂設施！位於新宿嘅東急歌舞伎町TOWER預計喺4月開幕，呢棟新建築物樓高48層，入面有酒店、戲院、劇場、餐廳、互動遊戲等娛樂設施，應有盡有。
最近官方就公布咗部分樓層嘅主題。一樓以餐廳為主，仲會有「和牛特區」使用嚴選日本國產黑毛和牛，提供漢堡、和牛料理； 二樓係以祭典為主題嘅餐飲美食空間，包括多國料理，夜晚更加會有表演，非常特別！至於娛樂方面，三樓係「namco TOKYO」，而四樓將會係名為「THE TOKYO MATRIX」嘅地牢攻略體驗設施。 之後會去東京旅行嘅話又多一個地方可以玩啦，好期待啊！
東急歌舞伎町TOWER
- 地址：東京都新宿区歌舞伎町一丁目29番1号 (地圖)
- 東急歌舞伎町TOWER官方網站
【澀谷東急百貨本店結業】
東急百貨本店屹立東京澀谷半個世紀，終於喺1月31日正式結業。喺無得去旅行嘅過去幾年，唔少日本歷史悠久嘅百貨公司都結束營業，相信好多人都黎唔切同佢哋講再見。最近日本又有一間百貨正式結業，就係屹立澀谷55年嘅東急百貨本店。為咗配合發展，其實近年東京鬧區，好似原宿、澀谷，都有多幢建築物計劃拆卸重建，東急百貨本店亦都因此而步入歷史。
東急百貨本店拆卸後將會興建一棟高36層嘅綜合設施，預計喺2027年竣工，計劃下層為商場，中層為豪華酒店，上層為豪華住宅。雖然知道為咗與時並進，拆卸舊建築係在所難免，不過見到又一東京地標消失，都係會覺得唔捨得。
【羽田機場「HANEDA AIRPORT GARDEN」】
大家有無試過搭早機到咗機場之後唔知有咩做呢？日本羽田機場有一個新嘅複合式商業設施即將開幕，到時就唔怕無地方行啦！ 呢個可以直達羽田機場第3航廈嘅「HANEDA AIRPORT GARDEN」喺2023年1月全面營業，入面唔止有商場，仲會有兩間酒店同埋溫泉。呢兩間酒店分別係「VILLA FONTAINE PREMIER 羽田機場」、「VILLA FONTAINE GRAND 羽田機場」，總共有1,717間客房，係日本最大嘅機場酒店！
「泉天空之湯 羽田機場」係機場酒店嘅露天溫泉，有天然溫泉、碳酸泉、按摩池等等設備可以選擇，呢間溫泉係24小時營業，預計都係今個月21號就會開幕，無論酒店住客定係一般旅客都可以使用。有咁多設施，以後去到羽田機場唔驚無野做啦！
HANEDA AIRPORT GARDEN
- 地址：東京都大田区羽田空港2丁目7 − 1羽田エアポートガーデン 2階 (地圖)
- 電話：+81 570-033-577
- HANEDA AIRPORT GARDEN官方網站
相關優惠：【全新日本酒店】東京新酒店推介！反斗奇兵新主題酒店！澀谷型格新酒店！
【新宿Shibuya Sky】
位於Shibuya Scramble Square嘅Shibuya Sky觀景台係最近非常之流行嘅打卡點！相信好多人已經去過晴空塔打卡，有別於晴空塔，Shibuya Sky觀景台開放露天區域，所以影相嗰陣無玻璃阻隔，影出嚟都靚啲。如果喺日落前1個鐘抵達觀景台，仲可以一次過睇到日間、黃昏、夜景三種景色。個景咁靚，唔怪之得連嵐嘅「Turning Up」MV都喺呢度取景啦！
經Klook預訂
Shibuya Sky
- 地址： 東京都渋谷区渋谷2丁目24 − 12, Shibuya Scramble Square (地圖)
- 電話：+81 342-210-229
- Shibuya Sky官方網站
相關優惠：小編直擊：11月新開幕日本吉卜力樂園｜一票難求！海外遊客購票攻略！｜一文睇晒3大園區神還原《千與千尋》、《龍貓》經典場景
餐廳資訊
【日劇《First Love》拍攝地餐廳】
「你鍾意食乜嘢？」(好きな食べ物なんですか？) 相信睇咗日劇《First Love》嘅話一定都知道呢句對白嘅含義！ 男主角並木晴道最鍾意嘅就係拿坡里意粉，呢道菜係劇入面出現咗好多次嘅名物，成年後嘅女主角野口也英仲推薦咗並木晴道去食「西洋軒」嘅拿坡里意粉，之後仲有好催淚嘅一幕都係喺呢間餐廳拍攝。
原來西洋軒係真實存在嘅洋食料理店，仲係一間好受當地人歡迎嘅老字號餐廳，已經有接近70年歷史！入面嘅裝修充滿昭和時代嘅感覺，有機會一定要去朝聖！ 不過聽講呢間餐廳嘅menu其實並無賣拿坡里意粉，佢哋嘅招牌名物係奄列飯同埋漢堡扒，唔知之後佢地會唔會因為呢套劇嘅熱潮喺menu增加拿坡里意粉呢個菜式呢？
西洋軒
- 地址：北海道千歳市千代田町1丁目 (地圖)
相關優惠：【東京迪士尼樂園/海洋】2023活動整合｜持續更新｜全新夜間匯演、40週年主題活動/酒店主題房間、幽靈公館期間限定活動、一年一度米妮日
【日劇《silent》拍攝地Cafe】
有留意開日劇嘅朋友仔應該唔會對《silent》呢套劇陌生啦！唔知大家有無發現劇入面有一間出現率幾高嘅cafe呢？原來呢間位於東京目黑區嘅鋪頭叫做「ANEA CAFE松見坂」，本身已經係小有名氣嘅咖啡店，喺《silent》播出之後更加係一夜爆紅，可以話係一位難求！ 因為個個都想喺劇中主角坐嘅位置打卡，所以店家特別將呢個座位變成預約制。聽講呢間鋪嘅人氣高到每逢週末都會大排長龍，就算只係想坐其他普通座位都要排一個鐘以上，Fans們如果想去打卡記得預留時間啦！
ANEA CAFE松見坂
- 地址：東京都目黒区駒場1丁目16 – 7 エマーレ駒場 1F (地圖)
- 電話：+81 368-049-209
- ANEA CAFE松見坂官方網站
相關優惠：【慳錢攻略】去日本Shopping必睇！2023日本各大商戶優惠券整合｜松本清、BicCamera、Joshin上新電器、Edion愛電王、Sofmap、KOJIMA、PAPASU、青山洋服
購物資訊
【池袋Animate擴建】
相信一眾動漫迷對池袋Animate本店呢個地方都唔會陌生！適逢池袋Animate本店踏入40週年，佢將會全面改裝擴建，並預計於3月16日開幕，到時候會成為全球最大型嘅Animate分店。擴建後店鋪地址一樣，但係因為會同隔離嘅大樓合拼，整體面積將會大咗好多！擴建後樓高10層，除咗售賣周邊商品嘅地方之外仲會有Cafe、活動空間等等不同嘅設施，相信之後唔少活動都會喺嘅度舉辦。打頭陣嘅活動就有3月16日至4月17日嘅《戀上換裝娃娃》展覽，以及3月18日《劇場版歌之☆王子殿下♪ 真愛ST☆RISH TOURS》嘅聲優座談會，Fans們千祈唔好錯過啦！
池袋ANIMATE
- 地址： 東京都豊島区東池袋1-20-7 (地圖)
- ANIMATE官方網站
相關優惠：【關西機場 – 大阪市區京都交通攻略】關西機場出市區交通方法大整合！HARUKA 關空特急/利木津機場巴士/南海電鐵Rapi:t介紹！
【無印良品板橋南町22新分店】
MUJI迷注意！ 東京有新分店開幕啦！呢間叫做「無印良品 板橋南町22」嘅新鋪足足有4層高，係關東地區入面最大嘅無印良品街鋪。最特別嘅係洗頭水、清潔劑、水果乾等等嘅貨品係可以按照需要斷秤購買，咁就唔怕買得太多用唔晒啦。
雖然呢間分店嘅地理位置唔算太方便，不過因為鋪頭外面設有24小時服務嘅商品提取櫃，而且仲係全日本唯一一間有「停車場提貨服務」嘅無印良品，所以都幾適合揸車嘅朋友去。MUJI Fans記住要去朝聖啦！
無印良品板橋南町22分店
- 地址： 東京都板橋区南町22番14号 (地圖)
- 電話：+81 03-6909-4511
- 無印良品官方網站
相關優惠：#小編出走：2023沖繩景點合集！國際通、牧志公設臨時市場、壺屋通、泊港漁市場
【池袋TOKYU HANDS舊址：NITORI家品店】
池袋TOKYU HANDS於2021年結業後，日本家品店NITORI（ニトリ）喺22年11月18日正式進駐TOKYU HANDS舊址！ 新鋪一共有8層，面積約5980平方米，將會係新宿、渋谷、池袋入面最大嘅分店。1樓至5樓主要售賣家品，6至8樓就會售賣大型傢俱。
NITORI係創立於1972年嘅日本著名家具連鎖品牌，主打低價格高品質嘅家居精品，販賣嘅貨品種類由大型傢俬如床架、梳化，到廚房用品如餐具、平底鍋都有，係深受日本人喜愛嘅家品店。 雖然好可惜池袋TOKYU HANDS已經結業，但係希望嚟緊嘅NITORI會成為池袋嘅新地標啦！
NITORI池袋分店
- 地址： 東京都豊島区東池袋1丁目28番10号 (地圖)
- 電話：+81 0120-014-210
- 無印良品官方網站
相關優惠：【全新日本酒店】5間大阪新酒店推介！日本首間W酒店！環球影城全新官方酒店！名設計師型格新酒店！
交通資訊
【行走的餐廳——52席的至福】
火車平時只係普通嘅交通工具，但係喺日本，佢仲可以係一架移動嘅餐廳！ 日本唔少鐵路公司都推出結合觀光同埋美食嘅特色列車，吸引唔少熱愛鐵路旅行嘅遊客。不過可惜好多都需要使用日本電話號碼或者日本信用卡先可以報名，唔太方便海外遊客。小編今次就搵到一款對海外遊客比較user-friendly嘅，就係西武鐵道餐廳列車「52席的至福」！
呢架列車由日本知名建築師隈研吾設計外觀、內裝，打造優雅嘅用餐空間並且提供米芝蓮級數美食，喺東京市區同埋東京近郊「秩父」之間穿梭，車程大概2小時30分鐘。 叫做「52席的至福」係因為佢只提供52個座位，列車分為四節車廂，當中有一節係開放式廚房，可以睇到大廚烹飪嘅過程。喺火車上面享受美食同埋美景，相信會係一個特別嘅體驗！
經Klook預訂
52席的至福
- 52席的至福官方網站
【東京的士加價】
東京的士加咗價啦！由22年11月14日起，東京的士嘅起錶價已經由原本嘅¥420 (約港幣23.5元) 加至¥500 (約港幣27.9元)，而跳錶收費就由每233米¥80 (約港幣4.5元) 加至每255米¥100 (約港幣5.6元)。原來東京的士上一次加價已經係2007年，今次係15年嚟第一次加價。的士業界指出疫情令客源大幅減少，司機收入受到影響。佢哋表示今次加價嘅費用亦會運用喺增加設置電子消費系統、行車記錄儀等等嘅設備上面，務求提升顧客嘅乘車體驗。
雖然東京的士一向俾人嘅印象好貴，不過如果有搭過嘅話都會感受到佢哋嘅服務有幾專業同埋體貼！再者，咁多年先加一次價都算係咁啦！
The post 【持續更新】日本東京2023旅遊資訊｜自由行必睇食、買、玩、交通攻略｜羽田機場新設施HANEDA AIRPORT GARDEN、必去SHIBUYA SKY appeared first on Flyday.hk.
香港旅遊優惠情報TG Group
[香港結伴同遊交友] -分享旅遊著數優惠及遊記攻略,一起去旅遊吧!! IOS下載 Android下載
[香港房屋分租共享App] - 室友合租,出租買賣,夾租短租,車位買賣,二手傢俬電器! IOS下載 Android下載
HKchat [香港匿名朋友圈] -- 一齊講秘密! 交友約會! 完全匿名!完全免費! 想講咩就講咩!! IOS下載 Andorid 下載
